وأنا أكتب الموضوع تذكرت أول رحلة لي إلى النمسا، شقد كنت معجبة ومتعجبة من طبيعة جبال الألب، وكله أتذكر لحن الحياة. هاي كانت رحلتي الخامسة إلى النمسا، بس ها المره كانت مختلفة لأن كانت نقاهه مع مشي على اليبال

رحلتنا كانت أسبوعين، الأسبوع الأول كان في كاتشبيرج، والأسبوع الثاني في شلادمينج. في المنطقتين عطونا خرايط الهايكينق (تترجم الكلمة إلى التنزه بين الجبال) وكتيبات ثانية عن الأشياء الي ممكن تسوونها في المنطقة

الأسبوع الأول كاتشبيرج

كانت فترة إقامتنا فيها أسبوع، وكان أسبوع جميل من “الهدوء”، معنى كلمة الهدوء تحصلونه في ها المنطقة، ويوم أقول هدوء صدق هدوء لدرجة لو تعقون الإبرة على الأرض بتسمعون صوتها

أنصح بالمنطقة إذا انتوا تحبون الأماكن الهاديه جداً، تحبون رياضة المشي، المشي جميل فيها. تضمنون فيها الجو البارد في الصيف، بس فترة الظهر الشمس تكون قوية، وشمسهم حاره بشكل عام

المطاعم موجودة في الفنادق، وشي كافيه في منتجع وكافيه ثاني في فندق كان قريب من سكنا، وممكن تاخذون أكل من السوبرماركت وتطبخون روحكم، بما أن غالبية النظام الموجود في المنطقة شقق. شي سوبرماركت في المنطقة، بس نحن نفضل ناخذ من المنطقة الي ، تحت. في المنطقة شي زحليقة صيفية صغيرة، لعبة التسلق، عربة خيول

ملاحظة: من الساعة 10 تبدا تتسكر الليتات في المنطقة، وعلى الساعة 11 ظلام وهدوء تام

 Speckalm apartments سكنا في كاتشبيرج 

موقعه حلو، الشقق نظيفة ومرتبة. فِي الشتاء موقعه ممتاز، لأن تلفريك السكي عداله. وأهم شي معاملتهم النا كانت ممتازه

:من ها المنطقة ممكن توصلون المناطق التالية
Villach 54 min
Bled 1 h 29 min
Ljubljana 2 hours
Vienna 3 h 54 mins
Bad hofgastein 1 h 24 min
Hallstatt 1 h 47 mins

ملاحظة: هالشتات وبليد ما فيها وايد باركات، في الصيف وايد زحمة فعادي جداً توصلون لين هناك وما تحصلون نص باركينق. وهالشتات أصغر بوايد من بليد، فحطوا ها المعلومة في بالكم قبل ما تسيرون وتأكدوا من فترتكم إذا تناسب ولا لا

الأسبوع الثاني شلادمينج

المنطقة عدالها وايد أماكن ووايد أشيا ممكن تسوونها، جميلة جداً، أنا حبيتها. عطونا بطاقة الصيف للمنطقة وكتيبات عن الأماكن الموجودة. بطاقة الصيف تدخل تلفريكات مختلفة مجاناً، وتدخل بعض الأماكن السياحية مجاناً، والباقي تسوي خصم عليه. حطوا في بالكم أن في أماكن لازم تحجزولها قبل في الانترنت، معلومة يديده علينا ومب متعودين على جي خصوصاً في النمسا شكلهم ناوين يحولون على السيستم الالكتروني

 Sun Lodge Schladming سكنا في شلادمينج

بشكل عام المكان وايد مرتب وموقعه حلو. المنطقة نفسها جميلة وها عامل مهم في أساسيات الاختيار. نصيحة لا تحجزون في الطابق الأرضي (الحديقة) أولاً ما شي خصوصية مثل البلكونات الي فوق (الخصوصية من ١٠٠٪ لأن البلكونة زجاج فممكن الناس الي يمشون  في الحديقة يشوفونكم) ، ثانياً حفلة الحشرات في الليل، كان شي ثاني. طبعاً أنا تعودت عقبها على الوضع

ختاماً، حديقة حيوانات حبيتها جداً، على اليبل وتصعدولها بالتلفريك، فيها مدينة ألعاب صغيرة، بس حلوه حق الصغارية (أنا من ضمن الصغارية) التجربة كانت وايد حلوه، وكلنا حبيناها

“Der Wilde Berg Maureen”